Депутат жұмыссыздарға 1 триллион теңгені таратып беруді ұсынды

25 Қыркүйек 2020, 03:20
1507
Бөлісу:
Депутат жұмыссыздарға 1 триллион теңгені таратып беруді ұсынды

Нұр-Сұлтан, BAQ.KZ. Мәжіліс депутаты Ирина Смирнова «Жұмыспен қамту жол картасына» жұмсалатын 1 триллион теңгені жұмыссыздарға таратып беруді ұсынды, деп хабарлады Sputnik Қазақстан.

Депутаттың айтуынша, «Жұмыспен қамту жол картасына» 1 триллион теңге қарастырылып, 255 мың адамды тұрақты және уақытша жұмысқа орналастыру жоспарланған. Сонда бір жұмыс орнын ашуға 4 миллион теңге жұмсалады. Ал ашылатын жұмыс орындарының дені – уақытша.

Уақытша жұмыс орындары үшін мұндай баға тым жоғары деп ойламайсыз ба? Сыбайлас жемқорлық деңгейі мен мемлекет қаржысын жұмсау тиімділігін ескерсек, бұл ақшаны азаматтарға бағдарламасыз-ақ беріп немесе жергілікті жобалар түрінде тікелей қолдау көрсетуге жұмсаған дұрыс болмай ма? - деген ұсыныс тастады Смирнова, Мәжілісте өткен Үкімет сағатында.

Еңбек және халықты әлеуметтік қорғау министрі Біржан Нұрымбетов «Жұмыспен қамту жол картасына» 1 триллион теңге көзделгенін растады. Оның 300 миллиард теңгесі республикалық бюджеттен, ал 700 миллиарды жергілікті бюджеттен бағытталады.

Сіз дұрыс айтасыз, есептеу кезінде бір жұмыс орнына 4 миллион теңгеден келеді. Бұл біздің қатаң талабымыз болатын. Қазір әкімдер мен жұмыс берушілер уақытша болса да бір жұмыс орнын ашуға мұндай ақша өте аз деп санайды. Бірақ, біз осындай қатаң талап қойдық, - деді министр.

Ол «Еңбек» бағдарламасында да уақытша жұмыс орындары басым екенін айтты. Алайда, олардың құны төмен.

Себебі, жастар практикасына, әлеуметтік жұмыс орындары мен қоғамдық жұмыстарға бағытталатын қаражаттың бәрі тек жалақыға ғана жұмсалады. Мұндай жұмыс орындарын құру жылына әлдеқайда арзанға түседі. Ең көбі жылына 600 мың теңгеге дейін, - деді Нұрымбетов.

Өзгелердің жаңалығы