Елордалық ұстаздар Кембридж университетінде біліктілігін арттырды

10 Желтоқсан 2019, 17:15
2413
Бөлісу:
Елордалық ұстаздар Кембридж университетінде біліктілігін арттырды

Нұр-Сұлтан, BAQ.KZ. Әлемдегі ең үздік жоғары оқу орнына айналған Кембридж университетінде елордалық 5 мектептің мұғалімдері мен қалалық Білім беруді жаңғырту орталығының әдіскерлері біліктілігін арттырды. Бұл туралы елорда әкімдігінің ресми сайты хабарлады. 

"Share" халықаралық жобасын жүзеге асыру аясында ағымдағы жылдың 1-7 желтоқсаны аралығында Кембридж қаласында Bottisham Village College, Sawston Village College және Кембридж университетінің білім беру факультетінде рефлексирлеуші практик мұғалімдердің қатысуымен бірнеше пайдалы workshop-тар өтті. 

Халықаралық жобаға елордалық № 37, 58, 59, 67, 76 мектептерінің мұғалімдері мен Білім беруді жаңғырту орталығының әдіскерлері қатысты. Шара барысында мектеп өмірі, мәдениеті, құндылықтары, көзқарасы, миссиясы және зерттеу қызметі, мектеп педагогтарын оқыту және оқыту тәжірибесін жетілдіру туралы дәрістер оқытылды. 

Сондай-ақ, ұстаздар рефлексивті зерттеу қауымдастығын құру, өзгерістерді басқару, өзгерістерді зерттеудің және іс — әрекеттегі тәжірибені зерттеудің негізгі процестері (Action research) секілді мәселерді талқылады. Одан бөлек, мұғалімдер психолог-зерттеушілер Коллин Маклафлин мен Кейт Эванспен кездесіп, сұрақтарына мазмұнды жауаптарды алды. 

Іс-шара барысында 2020 жылдың 20-21 қаңтарында Нұр-Сұлтан қаласында өтетін алдағы workshop бағдарламасы талқыға салынды.



Өзгелердің жаңалығы