Көлгінов: Аулаларды жобалау кезінде балалардың да, аға буынның да мүддесін ескереміз

16 Мамыр 2021, 21:42
1101
Бөлісу:
Көлгінов: Аулаларды жобалау кезінде балалардың да, аға буынның да мүддесін ескереміз

Нұр-Сұлтан, BAQ.KZ. Елорда әкімі Алтай Көлгінов Instagram парақшасында биыл 160 аула мен қоғамдық кеңістік абаттандырылатынын айтты.

Аулаларымызды жайлы ету үшін ауқымды жұмыстар жүргізіп келеміз. Қала тұрғындары терезеден аулаларының солғын көрінісін емес, керісінше, өзіндік кескін-келбеті қалыптасқан аулаларды көруі қажет. Аулаларды көпфункционалды етеміз, олар балалар үшін де, аға буын үшін де қызық болмақ. Биылдың өзінде абаттандыру жұмыстары 160 аула мен қоғамдық кеңістікті (саябақтар, скверлер, бульварлар) қамтиды. Елорданы "Нұр-Сұлтан - жайлы қала" мастер-жоспары аясында дамытып келеміз - деді шаһар басшысы.

Мәселен, былтыр 76 гектардан астам аумақты салып, абаттандырды. 

Бұл - тұрғындардың аулалары, біздің қалалықтар таза ауада уақыт өткізетін қоғамдық кеңістіктер, сонымен қатар аудандарды байланыстыратын қаладағы ең танымал учаскелер. Осылайша қалада серуенге барлық жағдай жасалып келеді. Қазіргі жұмыстарды ескере отырып, қала тұрғындарының жартысынан астамында жаяу қашықтықта жайлы уақыт өткізуге, спортпен шұғылдануға арналған орындар пайда болады. Бүгін бірқатар аулалардың құрылыс барысымен таныстым. Мысалы, Байқоңыр ауданында: Бейсекбаев көшесі 21, 21/1, Сейфуллин көшесі 69/1, 69/2, Абай даңғылы 101, 101/1, 101/2, Циолковский көшесі, 1; Алматы ауданында: Б.Момышұлы даңғылы, 12 және т. б. - деді Алтай Көлгінов.

Қаланың барлық аудандары жұмыспен қамтылды. Оның ішінде елді мекендер де бар. Сондай-ақ абаттандыру жұмыстарына "бюджетке қатысу" жобасы көмектеседі. Жоба аясында тұрғындар қандай ауланы көргісі келетінін, бірінші кезекте не қажет екенін айтады.

Аулаларды жобалау кезінде балалардың да, аға буынның да мүддесін ескереміз. Аулаішілік аумақтарда тұрғындардың мүдделерін ескере отырып, футбол/баскетбол алаңдарын, балалар ойын алаңдарын, жаттығу алаңдарын, воркаут-аймақтарды, жайлы күркелерді, иттерді серуендетуге арналған алаңдарды және т. б. орнатамыз. Жас кезінен бастап балаларды белсенді салауатты өмір салтын ұстануға үйрету маңызды. Осылайша шөлейт жерлерде, қараусыз қалған жерлерде таза ауада уақыт өткізуге арналған жаңа жайлы орындар пайда болады. Мемлекет басшысының тапсырмасы бойынша қаланы абаттандыру кезінде көгалдандыруға ерекше көңіл бөлеміз. Тек осы жылдың өзінде 1 млн-нан астам жасыл желек (ағаштар, бұталар, көшеттер және т. б.), оның ішінде елорданың "жасыл белдеуіне" отырғызамыз, — деді елорда әкімі.
Өзгелердің жаңалығы