Бас жаңалықтар
Қорғалжын сапары. "Ғасырдан да ұзақ күн", ғарыштан да ұзақ жол
PHOTO
15 Маусым 2020, 15:38 555

Қорғалжын сапары. "Ғасырдан да ұзақ күн", ғарыштан да ұзақ жол

Нұр-Сұлтан, BAQ.KZ тілшісі. Қорғалжыннан Бозоққа дейін созылған жолдың үшінші күні Шолақ көлдің жағасындағы ақбоз үйден басталды. Осы ретте сапар барысынан сыр шертетін жолсапар очеркі желісін жалғастырамыз.

Айта кетейік, жобаның басты мақсаты - биылғы коронавирус індеті жағдайында еліміздің ішкі туризмін насихаттау, Қазақстанның тарихи жерлерін таныстыру арқылы жылқы туризміне қызығушыларға мүмкіндік жасау. Атқа міну мәдениеті – қазақ халқының қанына сіңген, өмірлік серігіне айналған үрдіс. Экспедиция нәтижесінде еліміздің табиғи нысандары бойынша жаңа туристік бағыттар жасалып, GPS координатаға жаңа нүктелер түсірілетін болады

1.jpg 

At-travel.kz салт аттылар клубының жігіттері кешегі түнгі алаудың басында ән шырқап, қымызға қанып, бүгін өте жайлы ұйықтағандарын айтысып жатты.

2.jpg 

Таңғы 5-те тұрып, аттарды суарып, жолға дайындай бастадық.

3.jpg 

Самат Өкешұлы Шолақ көлінен 4 шақырым жердегі Өркендеу ауылында әкім бастаған ауыл адамдары күтіп отырғанын айтты.

4.jpg 

Таңғы ас ішіп, атқа мінерде Берік Ақылбеков ағамыз Саматқа клуб мүшелері атынан қоржын сыйлады.

5.jpg 

Ақтабанның арқасы шилі болып, жазылмай жүргеніне біраз болған. Бүгін ешкім мінбейтін болған соң, арқасына қаймақ жағып, жетекке алуға тура келді.

7.JPG 

Жолда жүргенде жинақы, жылдам, ылдым-жылдым қимылдап, әр ісіңе әбжілдікпен қарау керек. Сергек жүрсең, жаның да, көңілің де сергек болады. Біз бірден атқа қонып, Өркендеу ауылына тарттық.

8.jpg 

Ауыл тірлігі қашан да мамыражай. Қазақ даласындағы қай ауылға ат тұмсығын тіремеңіз, алдыңнан аңқылдаған ақжарқын азаматтар шығады.  

Ауыл әкімдігінің алдында ауыл басшысы Қалдыбала Оңғарқызы бастаған азаматтар күтіп тұр екен. Шашу шашып қарсы алды.

10.jpg 

Алда жол ұзақ. Ауыл адамдарының "Аттан түсіп ас ішіңіздер" деген өтінішіне қарайлай алмадық. Ауыл молдасының ақ батасын місе тұтысып, ілгері жылжыдық.

11.JPG 

Біз ауылдан шыға бергенде "Тоқтай тұрыңыздар" деген дауыс естілді. Тағы да сол ауыл әкімі Қалдыбала Оңғарқызы екен. 

Сіздерді қия алмадық, ауылдың шыға берісіндегі адресатта суретке түсіп қалайық, - деді ол.

Сонымен артта Қорғалжынның қорығын, Өркендеу ауылын тастап, ілгері жылжыдық. Самат жолдағы Жәнтеке ауылына дейін шығарып салмақ болып бірге жүрді.

13.JPG 

Өркендеуден тура жүрсеңіз, Жәнтекені жанай өтетін Нұр-Сұлтан-Қорғалжын автожолына дейін 30-35 шақырым. Алайда жолда Майшұңқыр бар. Айналасы қопалы көл.

 14.JPG

Айтпақшы, осы Майшұңқырдың маңында әйгілі "Дудар-ай" әнінде айтылатын Ащыкөл мен Тұщыкөл бар.

15.JPG 

Ащыкөлдің жағасында Самат Өкешұлы бізбен қоштасып, ауылына қайтты. Алдағы сапарларға бірге шығуға уәделескен осы бір ақкөңіл жігітті барлығымыз жақсы көріп қалдық.

 16.jpg

Түскі асты Жантекеден өтіп барып, бір шоқ теректің ортасында іштік. Жігіттер әзірге сыр берген жоқ. Бұған дейін жақын қашықтықтағы сапарларда бірге жүрген Сергей мен Темірбек болмаса, басқамыз алысқа төселіп қалғанбыз.

17.jpg 

Бүгінгі қоналқа әу баста Оразақ ауылы болатын. Алайда Оразақ карантинде болғандықтан, Нұраның арғы бетіндегі Отаутүскен ауылын межелегенбіз. Тіпті Отаутүскенде Сәдібек Түгел ағамыз бізді дастархан жасап, күтіп отыратын болған еді.

 18.jpg

Бұған дейінгі салт аттылар сапарында бағдаршы-навигатор болған. Ол қай жерде өзен, қай жерде көл барын анық көрсететін еді. Осы жолы бағдаршы болмағандықтан, бағытымыздан жаңылмас үшін алған бетімізден ат басын бұрмауға тырысамыз.

19.jpg 

Астыма мінген Сұлусарының осындайда бір ерекшелігі - ештеңеден тайсалмайтындығы, алдында не кездессе де беті қайтпай, тіке тартатыны. Мұндай аттың бір жақсысы - сенімді, бір жаманы - батпақ, терең су дегенге қарамай, түсіп кететіні.

20.jpg 

Жәнтекеден өткен соң алдымыздан жалпақ саз кездесті. Жолбасшы ретінде үнемі алдыда жүретіндіктен, арттағы жігіттердің амандығы маған байланысты. Анығы Сұлусарыға байланысты. Екі шеті 2 шақырымдай болатын сазға ат салуға тура келді. Абырой болғанда саз терең емес екен. Дегенмен суды шалпылдатып ұзақ жүру жүйкеге сыр беретінін байқадым.

21.JPG 

Күн ыстық. Жүріс өнбейді. Сұлусарының жүрісіне шыдамай, кейбір аттар кейіндеп қала бастады. Топ екі бөлінді. Алдыңғы топта Дидар, Қайрат, Мерген төртеуіміз кеттік.

22.jpg 

Артқы топта Берік аға, Темірбек, Сергейлер қалды. Бір жақсысы, Қорғалжын мен елорда арасындағы иен жазықта байланыс үзіле қоймайды. Артқы топпен телефон арқылы байланысып келеміз.

23.jpg 

Сабындыға тақағанда артқы топтағылар су таусылғанын айтып, Сабынды ауылынан су алуды ұсынды. Бізде де су да, қымыз да біткен болатын.

24.JPG 

Оразаққа дейін әлі 10-15 шақырым бар. Ал одан ары Отаутүскенге дейін қанша екені беймәлім. Күн еңкейіп барады.

 25.JPG

Оразақтың тұсына келгенде әбден қас қарайды. Дидар Оразақтан кейінгі Бірлік ауылы мен Отаутүскен арасында Нұрадан өтетін көпір бар екенін айтты. Ендігі бағдар тек ауылдардың алыстан көрінген жарығын бағдарлап жүру.

26.JPG 

Артқы топ бізге әлі жеткен жоқ. Оразақ ауылының тұсынан тура тартқанда қалың қамысқа келіп тірелдік. Ат сауырын сипаған қамыстың асты шылқылдаған саз. Жетектегі ат та жүріңкіремей келеді. Мына жолдың аяқталар түрі жоқ.

27.JPG 

Соқырқойлап жүргенімізге екі-үш сағат болды. "Тозақ оттары жымыңдаған" ауыл әлі жеткізер емес. Арттағылар хабарласты. "Сарка" ақсап қалған екен. Ілдәбайлап әрең жүрміз дейді. Біз Бірліктен өттік. Қамыс әлі таусылған жоқ. Көпірдің қарасы көрінбейді.

28.jpg 

Артқы топ Оразаққа енді жеткенін айтты. Біз көпірге таядық. Бірақ әлі жеткен жоқпыз. Сағат түнгі 12-ні көрсетті. Нұраның жағасы толған көлік. Жылт-жылт еткен от. Демалушылардың қарасы көп.

29.JPG 

Түнгі сағат 1-ден 15 минут асқанда Бірлік пен Отаутүскен арасындағы көпірге жеттік. Енді Отаутүскенге бару үшін көпірден өтіп алып, артқа қарай тағы 4-5 шақырым жүру керек. Аттарға жаным ашып тұр. Артқы топқа хабарластым. Олар Оразақтың маңына қонатынын айтты. Мен Көпір аузына ұйықтап, ертең жолды осы жерден бастайтынымды айттым.

30.jpg 

Біраз жігіт Қайролла ағаның машинасымен Отаутүскенге кетті. Қайрат екеуміз аттарды жайғастырып, далаға ұйықтадық. Бүгінгі күн бітпестей көрінді. Жамбасымыз жерге тигенде жаздың қысқа таңы құланиектеп келе жатқан еді...

Естеріңізде болса, Қорғалжын сапарынан бұған дейін де бірнеше жолжазба жазған едік. Алғашқысын мына жерден, ал екіншісін мына жерден оқуға болады.


Фото: автордан
Загрузка...