Бас жаңалықтар
Сапархан Омаров Түркияның ірі аграрлық компания делегациясын қабылдады
04 Желтоқсан 2020, 09:19 122

Сапархан Омаров Түркияның ірі аграрлық компания делегациясын қабылдады

Нұр-Сұлтан, BAQ.KZ. ҚР Ауыл шаруашылығы министрі Сапархан Омаровтың шақыруымен Dervisoglu Group компаниясының иесі және басшысы Қазақстанға арнайы келді. 

Сапар аясында түрік компаниясының өкілдері қазақстандық фермерлермен кездесіп, келіссөздер өткізеді, деп хабарлайды АШМ баспасөз қызметі.

Бұрын хабарланғандай, биыл қазан айында Ауыл шаруашылығы министрі Түркияның ірі агроөнеркәсіптік кәсіпорындарының басшыларымен бірқатар кездесу өткізіп, Қазақстанның ауыл шаруашылығының дамуы және АӨК-нің өндірістік әлеуеті туралы баяндап, сондай-ақ елдің агросекторына белсенді инвестиция салуға шақырған еді. Сапархан Омаров отандық фермерлермен ынтымақтастықты орнатуға кепілдік берген болатын. 

АШМ басшысының ұсынысын бірқатар компания (толығырақ осында және осы жерде), соның ішінде Стамбұл өнеркәсіп палатасының үздік 500 кәсіпорнының ішіндегі екінші орында тұрған және АҚШ-қа органикалық өнімді өсіруге, қайта өңдеуге және экспорттауға маманданған Dervisoglu Group компаниясы қабыл алды. 

Жылдық айналымы 285 миллион АҚШ долларын құрайтын Dervisoglu Group компаниясы Қазақстанмен органикалық егіншілік саласындағы ынтымақтастықты нығайту, соның ішінде майлы және дәнді дақылдарды өңдеу және буып-түю өндірісін құруға қызығушылық танытты. Өткен кездесу барысында тараптар жақын арада Қазақстанға сапармен келуге келіскен болатын. 

Бүгін министр Сапархан Омаров Нұр-Сұлтан қаласында Dervisoglu Group делегациясын қабылдады. 

Ауыл шаруашылығы министрлігіндегі кездесуден кейін компанияның акционері Саит Дервишоглу мен техникалық директор Мехмет Бучак органикалық ауыл шаруашылығы өнімдерін өсірумен айналысатын қазақстандық фермерлермен келіссөздер жүргізеді. Сондай-ақ, түрік компаниясы АҚШ нарығына қазақстандық өнімді экспорттау үшін американдық NОР сертификатын алу мүмкіндігін талқылауға ниетті, - делінген хабарламада.
     


Фото: дереккөз
Загрузка...